ଭୁବନେଶ୍ୱର: ଜେଇଇ(ମେନ୍) ପରୀକ୍ଷାର୍ଥୀମାନେ ଯେଭଳି ଅସୁବିଧାର ସମ୍ମୁଖୀନ ନ ହୁଅନ୍ତି ତାହାର ଦାୟିତ୍ୱ ନେଇଛନ୍ତି ରାଜ୍ୟ ସରକାର । ଦୂରଦୂରାନ୍ତରୁ ଆସୁଥିବା ଛାତ୍ରଛାତ୍ରୀମାନେ ଆବଶ୍ୟକ କଲେ ସେମାନଙ୍କ ଯାତାୟତ ପାଇଁ ସରକାର ମାଗଣାରେ ଗାଡ଼ି ଯୋଗାଇଦେବେ । ଯେଉଁମାନେ ନିଜ ସୁବିଧାରେ ଗାଡ଼ିରେ ଆସିବେ ସବୁପ୍ରକାର ସହଯୋଗ ଦିଆଯିବ ।
ସେହିପରି, ଆସନ୍ତା ୩୦ ତାରିଖରୁ ସେପ୍ଟେମ୍ବର ୭ ତାରିଖ ପର୍ଯ୍ୟନ୍ତ ପରୀକ୍ଷାର୍ଥୀ ଏବଂ ସେମାନଙ୍କ ଅଭିଭାବକମାନଙ୍କ ପାଇଁ କୋଭିଡ୍ କଟକଣା ଲାଗୁ ହେବ ନାହିଁ । ଆଡମିଟ୍ କାର୍ଡ ଦେଖାଇଲେ ସେମାନଙ୍କୁ ଯା ଆସ କରିବାର ଅନୁମତି ମିଳିବ ।
ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀ ଏବଂ ବିଭାଗୀୟ ସଚିବ ସଞ୍ଜୟ ସିଂ ଆଜି ଏକ ସାମ୍ବାଦିକ ସମ୍ମିଳନୀରେ ଏହି ଗୁରୁତ୍ୱପୂର୍ଣ୍ଣ ଘୋଷଣା କରିଛନ୍ତି । ମୁଖ୍ୟ ଶାସନ ସଚିବଙ୍କ ସୂଚନା ଅନୁଯାୟୀ, ପ୍ରତି ଜିଲ୍ଲାରେ ଥିବା ଆଇଟିଆଇ ସେଣ୍ଟରକୁ ନୋଡାଲ୍ ସେଣ୍ଟର କରାଯିବ । ପରୀକ୍ଷାର୍ଥୀମାନେ ସେମାନଙ୍କ ସମ୍ପର୍କରେ ତଥ୍ୟ ସଂପୃକ୍ତ ଜିଲ୍ଲାର ନୋଡାଲ୍ ସେଣ୍ଟରକୁ ଜଣାଇବାକୁ ଅନୁରୋଧ କରାଯାଉଛି । ସେହି ଅନୁଯାୟୀ, ଯାହାର ଗାଡ଼ି ଆବଶ୍ୟକ ଯୋଗାଇ ଦିଆଯିବ । ଇଂଜିନିୟରିଂ କଲେଜ ହଷ୍ଟେଲ୍ ଗୁଡ଼ିକ ପରୀକ୍ଷାର୍ଥୀ ଓ ଅଭିଭାବକମାନଙ୍କ ରହିବା ନିମନ୍ତେ ବ୍ୟବସ୍ଥା କରାଯାଇଛି । ମାଗଣାରେ ସେମାନେ ରହିବେ ।
ଆସନ୍ତା ସେପ୍ଟେମ୍ବର ୧ରୁ ୬ ତାରିଖ ପର୍ଯ୍ୟନ୍ତ ଜେଇଇ(ମେନ୍) ପରୀକ୍ଷା ଅନୁଷ୍ଠିତ ହେବ । ୭ଟି ସହରର ୨୬ଟି କେନ୍ଦ୍ରରେ ପରୀକ୍ଷା ଅନୁଷ୍ଠିତ ହେବ । ରାଜ୍ୟର ୩୭ ହଜାର ଛାତ୍ରଛାତ୍ରୀ ଏହି ପରୀକ୍ଷା ଦେଉଥିବା ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି ।
ସୂଚନାଥାଉକି, କୋଭିଡ୍ ପରିସ୍ଥିତି ଯୋଗୁଁ ଜେଇଇ(ମେନ୍) ଓ ନିଟ୍ ପରୀକ୍ଷା ଘୁଞ୍ଚାଇବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ଶିକ୍ଷାମନ୍ତ୍ରୀଙ୍କୁ ପ୍ରଥମେ ଚିଠି ଲେଖିଥିଲେ । ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଟେଲିଫୋନ୍ ରେ କଥା ହୋଇଥିଲେ । ମାତ୍ର କିଛି ଫଳ ନାହିଁ । ରାଜ୍ୟରେ ବର୍ତ୍ତମାନ କୋଭିଡ୍ ସାଙ୍ଗକୁ ବନ୍ୟା ପରିସ୍ଥିତି । ଏଭଳି କ୍ରିଟିକାଲ୍ ସମୟରେ ପରୀକ୍ଷା ଦେବାକୁ ଯାଉଛନ୍ତି ଛାତ୍ରଛାତ୍ରୀ ।
