‘ରାଜ୍ ଇଲେକଟ୍ରୋନିକ୍ସ’ରେ କରୋନା; ଦୋକାନ ସିଲ୍, ୫୦ କ୍ୱାରେଣ୍ଟାଇନ୍

ଖବରକୁ ଚାପିଦେଲେ ପ୍ରମୁଖ ଗଣମାଧ୍ୟମ !

ଭୁବନେଶ୍ୱର: ସବୁବେଳେ ଗ୍ରାହକଙ୍କ ଗହଳି ଚହଳି ଲାଗି ରହୁଥିବା ବାପୁଜୀନଗରର ପ୍ରମୁଖ ଦୋକାନ ‘ରାଜ୍ ଇଲେକଟ୍ରୋନିକ୍ସ’ ରେ କରୋନା । ଦୋକାନର ଜଣେ କର୍ମଚାରୀ କରୋନା ପଜିଟିଭ୍ ଚିହ୍ନଟ ହେବା ପରେ ଗତକାଲି ବିଏମସି ଏହି ଦୋକାନକୁ ସିଲ୍ କରିଛି । ଦୋକାନ ଏବଂ ଦୋକାନର ୫୦ ଜଣ କର୍ମଚାରୀଙ୍କୁ କ୍ୱାରେଣ୍ଟଣ୍ଟାଇନ୍ ରେ ରଖାଯାଇଛି ।

କରୋନା ପଜିଟିଭ୍ ଚିହ୍ନଟ ହୋଇଥିବା ରାଜ୍ ଇଲେକଟ୍ରୋନିକ୍ସ ର କର୍ମଚାରୀ ଜଣଙ୍କ ଘର କଟକ ଜିଲ୍ଲା ଆଠଗଡ଼ ଅଞ୍ଚଳରେ । କରୋନା ହଟସ୍ପଟ୍ ପାଲଟିଥିବା ତାଙ୍କ ଗାଁଟି ଏବେ କଣ୍ଟେନମେଣ୍ଟ୍ ଜୋନ୍ ରେ ରହିଛି । ଗତ ଶୁକ୍ରବାର ଦିନ ଗାଁକୁ ଛୁଟିରେ ଯାଇଥିଲେ ସଂପୃକ୍ତ କର୍ମଚାରୀ । କାମରେ ଯୋଗଦେବା ପାଇଁ ବୁଧବାର ଦିନ ଫେରିବା ପୂର୍ବରୁ ଗାଁରେ ତାଙ୍କର ବ୍ଲଡ୍ ଓ ସ୍ୱାବ୍ ନମୁନା ସଂଗ୍ରହ କରାଯାଇଥିଲା । ତେବେ ଟେଷ୍ଟ ରିପୋର୍ଟକୁ ଅପେକ୍ଷା ନ କରି ସଂପୃକ୍ତ କର୍ମଚାରୀ କାମରେ ଯୋଗ ଦେଇଥିଲେ । ବୁଧବାର ଦିନ ସେ ଦୋକାନରେ ଥିଲା ବେଳେ ତାଙ୍କ ଟେଷ୍ଟ ରିପୋର୍ଟ ପଜିଟିଭ୍ ରିପୋର୍ଟ ବାହାରିଥିବା ଫୋନ୍ ଆସିଥିଲା ।

ତୁରନ୍ତ କୋଭିଡ୍ ଟିମ୍ ସେଠାରେ ପହଞ୍ଚି ତାଙ୍କୁ ହସ୍ପିଟାଲ୍ ନେଇ ଆସିଥିଲେ । ଗତକାଲି ଦିନ ୧୧ଟା ବେଳକୁ ବିଏମସି ପକ୍ଷରୁ ଏକ ଟିମ୍ ‘ରାଜ୍ ଇଲେକଟ୍ରୋନିକ୍ସ’ ଦୋକାନକୁ ସିଲ୍ କରିବା ସହ ଦୋକାନରେ ପୂର୍ବଦିନ ଉପସ୍ଥିତ ୫୦ ଜଣ କର୍ମଚାରୀଙ୍କୁ କ୍ୱାରେଣ୍ଟାଇନ୍ ପଠାଇଥିଲେ । ଆସନ୍ତା ୧୪ ତାରିଖ ପର୍ଯ୍ୟନ୍ତ ଦୋକାନକୁ ସିଲ୍ କରାଯାଇ ପ୍ରଶାସନର ନିରୀକ୍ଷଣରେ ରଖାଯାଇଛି ।

ଗୁରୁତ୍ୱପୂର୍ଣ୍ଣ କଥା ହେଉଛି ବାପୁଜୀନଗରର ଏହି ପ୍ରମୁଖ ଇଲେକଟ୍ରୋନିକ୍ସ ଦୋକାନର କର୍ମଚାରୀ କରୋନା ପଜିଟିଭ୍ ଚିହ୍ନଟ ହେବାରୁ ଦୋକାନ ସିଲ୍ ହୋଇଥିଲେ ମଧ୍ୟ ପ୍ରମୁଖ ଗଣମାଧ୍ୟମରେ ଏହି ଖବର ଆସିଲା ନାହିଁ । ସାମ୍ବାଦିକମାନେ ଏହି ଖବର ପାଇ ଘଟଣାସ୍ଥଳରୁ ଭିଜୁଆଲ୍ ଓ ଖବର ସଂଗ୍ରହ କରିଥିଲେ । ମାତ୍ର ତାହା ଅଫିସ୍ ରେ ଚାପି ହୋଇଗଲା । ଗତକାଲି ଯେଉଁ ସମୟରେ ବରମୁଣ୍ଡା ହାଉସିଂ କଲୋନୀସ୍ଥିତ ରୁଚିକା ଘରୋଇ ନର୍ସିଂହୋମ୍ ସିଲ୍ କରାଯାଉଥିଲା ସେତିକିବେଳେ ରାଜ୍ ଇଲେକଟ୍ରୋନିକ୍ସ ଦୋକାନ ବି ସିଲ୍ ହେଉଥିଲା । ମାତ୍ର ରୁଚିକା ନର୍ସିଂହୋମ୍ ସିଲ୍ ଘଟଣା ଟିଭି ପରଦାରେ ଘନ ଘନ ବ୍ରେକିଂ ଖବର ହୋଇଥିଲା ବେଳେ ରାଜ୍ ଇଲେକଟ୍ରୋନିକ୍ସ ସିଲ୍ ଖବର ଆସିଲା ନାହିଁ । ଖବରକାଗଜରେ ବି ସେଇ ଏକାକଥା । ସର୍ବସାଧାରଣଙ୍କୁ ଏହି ଖବରଟି ଜଣାଇବାକୁ ପ୍ରମୁଖ ଗଣମାଧ୍ୟମ କର୍ତ୍ତୃପକ୍ଷ ଉଚିତ୍ ମଣିଲେ ନାହିଁ ।

ପ୍ରମୁଖ ଗଣମାଧ୍ୟମ ୱେଲ୍ ମ୍ୟାନେଜଡ୍ ହେବା ପଛର ନିର୍ଦ୍ଦିଷ୍ଟ କାରଣ ବି ରହିଛି । କାରଣ ରାଜ୍ ଇଲେକଟ୍ରୋନିକ୍ସ ସେମାନଙ୍କ ପାଇଁ ଦୁଧିଆଳୀ ଗାଈ ସଦୃଶ । ବର୍ଷତମାମ ବିଜ୍ଞାପନ ଆକାରରେ ମୋଟା ମାଲ୍ ଦେଇଥାଏ । ତେଣୁ ଦୋକାନରେ କରୋନା ପଶିଥିଲେ ବି ବେପାର ଘାଟା କରିବାକୁ ସେମାନେ ଚାହିଁନାହାନ୍ତି ନଚେତ୍ ବାପୁଜୀନଗରରୁ ଚାପ ପଡ଼ିଥାଇପାରେ । ରୁଚିକା ନର୍ସିଂହୋମ୍ ବିଜ୍ଞାପନ ଦେଉ ନ ଥିବାରୁ ତା’ କଥା ଅଲଗା । ସୁଯୋଗ ମିଳିଛି ତ ପିଟି ଦିଅ ।

ବିଜ୍ଞାପନ ମାନଦଣ୍ଡରେ ଗଣମାଧ୍ୟମର ବାଛବିଚାର ନୀତି ସବୁବେଳେ ରହିଛି ଓ ରହିବ । ମାତ୍ର ଜନଜୀବନ ସୁରକ୍ଷା ଜଡ଼ିତ ଥିବା ବଡ଼ ଖବରଟିକୁ ପଇସା ଲୋଭରେ ଯେ ଚପାଇ ଦିଆଯାଇପାରେ ତାହା ଅନେକଙ୍କୁ ଆଚମ୍ବିତ କରିଛି ।