ମୁମ୍ବାଇ: ଶ୍ରୀଦେବୀଙ୍କ ମୃତ୍ୟୁ ଦୃଦଘାତରେ ହୋଇନାହିଁ । ହୋଟେଲ ରୁମ୍ ବାଥଟବ୍ ରେ ବୁଡ଼ି(ଆକ୍ସିଡେଣ୍ଟାଲ୍ ଡ୍ରାଉନିଂ) ସେ ପ୍ରାଣ ହରାଇଥିବା ଶବ ବ୍ୟବଚ୍ଛେଦ ରିପୋର୍ଟରୁ ଜଣାପଡ଼ିଛି । ଭାରସାମ୍ୟ ହରାଇ ସେ ତଳେ ପଡ଼ିଯାଇଥିବା କୁହାଯାଉଛି । ବ୍ୟବଚ୍ଛେଦ ରିପୋର୍ଟରେ ତାଙ୍କ ଶରୀରରୁ ଆଲକୋହଲ ସନ୍ଧାନ ବି ମିଳିଥିବା କୁହାଯାଉଛି । ଦୁବାଇ ପୁଲିସ ଶ୍ରୀଦେବୀଙ୍କ ଫୋନ୍ କଲ୍ ରେକର୍ଡ ଖୋଜିବା ଆରମ୍ଭ କରିଛି । ଅଧିକ ତଦନ୍ତ ପାଇଁ ମାମଲା ଦୁବାଇ ପୁଲିସ ପ୍ରୋସିକ୍ୟୁସନ୍ କୁ ହସ୍ତାନ୍ତର କରାଯାଇଛି । ତଦନ୍ତର ଜଟିଳତା ଦୃଷ୍ଟିରୁ ଶ୍ରୀଦେବୀଙ୍କ ମରଶରୀର ମୁମ୍ବାଇ ଆସିପାରିନାହିଁ । କେତେବେଳେ ଆସିବ ତାହା ମଧ୍ୟ ନିଶ୍ଚିତ ହୋଇପାରୁନାହିଁ ।
ଶନିବାର ରାତିରେ ଦୁବାଇର ଜୁମୈରା ଏମିରେଟସ୍ ହୋଟେଲରେ ଶ୍ରୀଦେବୀଙ୍କର ହଠାତ୍ ମୃତ୍ୟୁ ହୋଇଥିଲା । ଭଣଜା ମୋହିତ୍ ମାରୱାଙ୍କ ବିବାହ ଉତ୍ସବରେ ଯୋଗଦେବାକୁ ସେ ତିନି ଦିନ ତଳେ ପରିବାର ସହ ଦୁବାଇ ଯାଇଥିଲେ । ବାହାଘର ପରେ ଅନ୍ୟମାନେ ମୁମ୍ବାଇ ଫେରି ଆସିଥିଲେ ମଧ୍ୟ ଶ୍ରୀଦେବୀ ତାଙ୍କ ଭଉଣୀ ଶ୍ରୀଲତାଙ୍କୁ ଭେଟିବା ପାଇଁ ହୋଟେଲରେ ରହିଥିଲେ । ଶ୍ରୀଦେବୀଙ୍କୁ ଆଣିବାକୁ ସ୍ୱାମୀ ବୋନି କପୁର ଶନିବାର ସଂଧ୍ୟାରେ ପୁଣି ଦୁବାଇରେ ପହଞ୍ଚିଥିଲେ । ଡିନର୍ ପାଇଁ ଦୁହେଁ ବାହାରିବା ପୂର୍ବରୁ ଶ୍ରୀଦେବୀ ବାଥରୁମ୍ ଯାଇଥିଲେ । ମାତ୍ର ବହୁ ସମୟ ପରେ ଶ୍ରୀଦେବୀ ଭିତରୁ ବାହାରି ନ ଥିଲେ । କବାଟ ବାଡ଼େଇଲେ ବି ଶୁଣି ନ ଥିଲେ । କିଛି ସମୟ ପରେ ହୋଟେଲ କର୍ମଚାରୀଙ୍କ ସହାୟତାରେ ସ୍ୱାମୀ କବାଟ ଭାଙ୍ଗି ଦେଖିଲା ବେଳକୁ ଶ୍ରୀଦେବୀ ଟବ୍ ଭିତରେ ଅଚେତ ହୋଇ ପଡ଼ିଥିଲେ । ତାଙ୍କୁ ତୁରନ୍ତ ସେଠାକାର ରସିଦ୍ ହସ୍ପିଟାଲ୍ କୁ ନିଆଯାଇଥିଲା । ମାତ୍ର ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ମାସିଭ୍ ହାର୍ଟଷ୍ଟ୍ରୋକ୍ ଯୋଗୁୁଁ ମୃତ୍ୟୁ ହୋଇଥିବା ଡାକ୍ତର କହିଥିଲେ ।
ତେବେ ଭାରତୀୟ ସମୟ ଆଜି ଅପରାହ୍ନରେ ବ୍ୟବଚ୍ଛେଦ ରିପୋର୍ଟ ଆସିଲା ପରେ ମୃତ୍ୟୁର କାରଣ ଅସ୍ପଷ୍ଟ ହୋଇଯାଇଛି । ଏଥିସହ ଶ୍ରୀଦେବୀଙ୍କ ମୃତ୍ୟୁ ରହସ୍ୟଘେରକୁ ଚାଲିଯାଇଛି । ଦୁବାଇ ପୁଲିସ ଛାନଭିନ୍ ଦୃଷ୍ଟିରୁ ଶ୍ରୀଦେବୀଙ୍କ ଶବ ହସ୍ତାନ୍ତରରେ ଅନିଶ୍ଚିତତା
ଲାଗିରହିଛି । ଏପଟେ ଶ୍ରୀଦେବୀଙ୍କ ଅନ୍ତିମ ଦର୍ଶନ ପାଇଁ ତାଙ୍କର ମୁମ୍ବାଇ ଜୁହୁସ୍ଥିତ ବାସଭବନ ଗତରାତିଠାରୁ ଜନସମୁଦ୍ର ପାଲଟିଯାଇଛି । ସାଧାରଣ ଜନତାଙ୍କ ସମେତ ବଲିଉଡ଼ର ରଥୀ ମହାରଥୀମାନେ ସେଠାରେ ଚାହିଁ ବସିଛନ୍ତି । ଆରପାରିକୁ ଚାଲିଯାଇଥିବା ସେମାନଙ୍କର ପ୍ରିୟ ଶ୍ରୀଦେବୀ କେତେବେଳେ ପହଞ୍ଚିବେ ସେ ନେଇ ଉତ୍କଣ୍ଠା ଲାଗିରହିଛି ।