ମୁଖ୍ୟମନ୍ତ୍ରୀଙ୍କ ସହ ସେଲଫି ନେଲେ, ଲଂଚ୍ କଲେ ରେହେମାନ୍

ଭୁୁବନେଶ୍ୱର: ବଲିଉଡ୍ ର ପ୍ରସିଦ୍ଧ ସଙ୍ଗୀତ ନିର୍ଦ୍ଦେଶକ ଓସ୍କାର ବିଜେତା ଏ.ଆର.ରେହେମାନ୍ ଆଜି ଭୁବନେଶ୍ୱରରେ ପହଞ୍ଚିଛନ୍ତି । ବିଶ୍ୱକପ୍ ହକିର ଉଦଘାଟନୀ ସମାରୋହରେ ସେ ସଙ୍ଗୀତ ପରିବେଷଣ କରିବେ । ଭୁବନେଶ୍ୱରରେ ପାଦ ଦେବା ପରେ ରେହେମାନ୍ ସର୍ବପ୍ରଥମେ ନବୀନ ନିବାସ ଯାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଥିଲେ । ସାକ୍ଷାତ ଆଲୋଚନା ପରେ ନବୀନ ନିବାସ ବଗିଚାରେ ମୁଖ୍ୟମନ୍ତ୍ରୀଙ୍କ ସହ ବୁଲି ବୁଲି ସେଲଫି ନେଇଥିଲେ ରେହେମାନ୍ । ମୁଖ୍ୟମନ୍ତ୍ରୀଙ୍କ ଆମନ୍ତ୍ରଣ ରକ୍ଷା କରି ରେହେମାନ୍ ତାଙ୍କ ସାଙ୍ଗରେ ମଧ୍ୟାହ୍ନ ଭୋଜନ କରିଥିଲେ ।

ଉଭୟଙ୍କ ମଧ୍ୟରେ ବିଶ୍ୱକପ୍ ହକି ଛଡ଼ା ପାରମ୍ପରିକ ଓ ଆଦିବାସୀ ସଙ୍ଗୀତରେ ବ୍ୟବହୃତ ବାଦ୍ୟଯନ୍ତ୍ରର ସଂରକ୍ଷଣ ସମ୍ପର୍କରେ ଆଲୋଚନା ହୋଇଥିଲା । ଜୟ ହୋ, ବନେ୍ଦ ମାତରମ୍ ଭଳି ଅନବିଦ୍ୟ କୃତିତ୍ୱ ପାଇଁ ମୁଖ୍ୟମନ୍ତ୍ରୀ ରେହେମାନ୍ ଙ୍କୁ ଉଚ୍ଚ ପ୍ରଶଂସା କରିଥିଲେ । ଏଠାରେ ଥିବା ଟ୍ରାଇବାଲ୍ ମ୍ୟୁଜିୟମ୍ ପରିଦର୍ଶନ କରିବାକୁ ମୁଖ୍ୟମନ୍ତ୍ରୀ ତାଙ୍କୁ ପରାମର୍ଶ ଦେଇଥିଲେ । ଆଲୋଚନାକାଳରେ ରେହେମାନ୍ ଭୁବନେଶ୍ୱର ସହରକୁ ପ୍ରଶଂସାରେ ପୋତି ପକାଇଥିଲେ । ବିଶ୍ୱକପ୍ ହକି ଭଳି ମେଗା ଟୁର୍ଣ୍ଣାମେଣ୍ଟ ଆୟୋଜନ କରିଥିବାରୁ ମୁଖ୍ୟମନ୍ତ୍ରୀଙ୍କ ଆଦର କରିବା ସହ ଧନ୍ୟବାଦ ଜଣାଇଥିଲେ ।

ଉଦଘାଟନ ଉତ୍ସବର ମୁଖ୍ୟ ଆକର୍ଷଣ ରେହେମାନ୍ ଙ୍କୁ ନେଇ ହକିପ୍ରେମୀମାନେ ପ୍ରବଳ ଉତ୍ସାହିତ ହୋଇପଡ଼ିଛନ୍ତି । ୨୭ ତାରିଖରେ କଳିଙ୍ଗ ଷ୍ଟାଡିୟମ୍ ଓ ୨୮ ତାରିଖରେ ବାରବାଟୀ ଷ୍ଟାଡିୟମ୍ ରେ ରେହେମାନ୍ ତାଙ୍କ ସଙ୍ଗୀତର ଯାଦୁ ପ୍ରଦର୍ଶନ କରିବେ ।