.ବିଶ୍ୱକପ୍ ହକି ଉଦଘାଟିତ
.ଇତିହାସ ରଚିଲା କଳିଙ୍ଗ ଷ୍ଟାଡିୟମ୍
.ଦର୍ଶକଙ୍କୁ ମତୁଆଲା କଲେ ରହେମାନ୍
ଭୁୁବନେଶ୍ୱର: ଖଚାଖଚ୍ ଓ ଚକାଚକ୍ ବର୍ଣ୍ଣାଢ଼୍ୟ ପରିବେଶରେ ଆଜି ସଂଧ୍ୟାରେ କଳିଙ୍ଗ ଷ୍ଟାଡିୟମ୍ ରେ ଉଦଘାଟିତ ହୋଇଛି ପୁରୁଷ ବିଶ୍ୱକପ୍ ହକି । ପ୍ରାୟ ଅଢ଼େଇ ଘଣ୍ଟାର ରଙ୍ଗରଙ୍ଗ ଉତ୍ସବ ସହ ବିଶ୍ୱ ଦରବାରରେ ଝଲସି ଉଠିଛି ଓଡ଼ିଶା । ବଲିଉଡର ସୁପରଷ୍ଟାର୍ ଶାହାରୁଖ ଖାନ୍ ଙ୍କ ହୃଦୟସ୍ପର୍ଶୀ ବକ୍ତବ୍ୟ, ଧକ୍ ଧକ୍ ଗାର୍ଲ ମାଧୁରୀ ଦୀକ୍ଷିତଙ୍କ ଅବତାରି ନୃତ୍ୟରେ କମ୍ପି ଉଠିଥିଲା କଳିଙ୍ଗ ଷ୍ଟାଡିୟମ୍ । ପ୍ରସିଦ୍ଧ ସଙ୍ଗୀତଜ୍ଞ ଏ.ଆର. ରହେମାନ୍ ଙ୍କ ମୁହଁରୁ ତାଙ୍କର କାଳଜୟୀ ସଙ୍ଗୀତର ଯାଦୁ ମତୂଆଲା କରିଦେଇଥିଲା ଦର୍ଶକଙ୍କୁ । ତାଙ୍କ ଗୀତର ତାଳେ ତାଳେ ଝୁମି ଉଠିଥିଲା ସମଗ୍ର କଳିଙ୍ଗ ଷ୍ଟାଡିୟମ୍ । ଜୟ ହିନ୍ଦ୍ ଗୀତରେ ବିଭୋର ହୋଇଯାଇଥିଲା କୋଣ ଅନୁକୋଣ । ଖାଲି ଓଡ଼ିଶା ନୁହେଁ ସମଗ୍ର ଦେଶ ଓ ବିଶ୍ୱର କୋଟି କୋଟି ଜନତା ଏହାର ଲାଇଭ୍ ପ୍ରସାରଣ ଦେଖିଥିଲେ ।
୧୬ ଦେଶ ଭାଗ ନେଇଥିବା ବିଶ୍ୱକପ୍ କୁ ଏହି ଉତ୍ସବ ମାଧ୍ୟମରେ ଆନୁଷ୍ଠାନିକ ଭାବେ ଉଦଘାଟନ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଅତିଥି ଭାବେ ବିଶେଷ ଆକର୍ଷଣ ଥିଲେ ଶାହାରୁଖ୍ ଖାନ୍ । ହକି ଖେଳ ପାଇଁ ପରିଚିତ ଓଡ଼ିଶା ମାଟିକୁ ସେ ଆଦର କରିବା ସହ ଏଭଳି ହକି ବିଶ୍ୱମେଳାକୁ ସଫଳତାର ସହ ଆୟୋଜନ କରିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଉଚ୍ଚ ପ୍ରଶଂସା କରିଥିଲେ । ଏହି ଅବସରରେ ସେ ଅଭିନୟ କରିଥିବା ‘ଚକ ଦେ ଇଣ୍ଡିଆ’ଫିଲ୍ମର ଡାଇଲଗ୍ ମାରି ଦର୍ଶକଙ୍କ ମନ କିଣିନେଇଥିଲେ । ବଲିଉଡ଼ ସୁପରଷ୍ଟାର୍ ମାଧୁରୀ ଦୀକ୍ଷିତ ଭୂଦେବୀ ନୃତ୍ୟରେ ଦର୍ଶକଙ୍କ ମନୋରଂଜନ କରିଥିଲେ । ତାଙ୍କ ସହ ତାଳଦେଇ ଶାସ୍ତ୍ରୀୟ ଓ ପାଶ୍ଚାତ୍ୟର ୧୪ ନୃତ୍ୟ ସଙ୍ଗମରେ ପ୍ରସ୍ତୁତ ହୋଇଥିଲା ଏକତାର ଚମକ । ଓଡ଼ିଶା ତଥା ସମଗ୍ର ଭାରତକୁ ବିଶ୍ୱ ଆଗରେ ଉପସ୍ଥାପିତ କରିବା ପାଇଁ ଓଡ଼ିଶୀ, ଭାରତନାଟ୍ୟମ୍, ମଣିପୁରୀ, କଥକ, କୁଚିପୁଡ଼ି, ସତ୍ରିୟା ଓ ମୋହିନୀ ଆଟ୍ଟମ୍ ନୃତ୍ୟ ଏକକାଳୀନ ଗୋଟିଏ ସମୟରେ ଓ ଗୋଟିଏ ମଞ୍ଚରେ ଦେଖିବାକୁ ମିଳିଥିଲା ।
