କଟକ: କଟକ ବାରବାଟୀ ଷ୍ଟାଡିୟମ୍ ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବଲିଉଡ୍ ଷ୍ଟାର୍ ସଲମାନ୍ ଖାନ୍ ଙ୍କ ଏକ ବିରଳ ଫଟୋ ସୋସିଆଲ୍ ମିଡ଼ିଆରେ ଭାଇରାଲ୍ ହୋଇଛି । ଫଟୋରେ ନବୀନ ଏକ ଚେୟାରରେ ବସିଛନ୍ତି । ପଛପଟେ ଛିଡ଼ା ହୋଇଥିବା ସଲମାନ୍ ତାଙ୍କ କାନ୍ଧକୁ ଧରି ମୁହଁରେ ମୁହଁ ଯୋଡିଛନ୍ତି । ଅତ୍ୟନ୍ତ ଉତ୍ସାହିତ ସଲମାନ୍ ଙ୍କ ମୁହଁରୁ ନବୀନଙ୍କ ପ୍ରତି ଭକ୍ତି ଓ ସମ୍ମାନ ଫଟୋରୁ ବାରିହୋଇଯାଉଛି । ନବୀନ ବି ବେଶ୍ ଉଲ୍ଲସିତ ଦେଖାଯାଉଛନ୍ତି । ସୋସିଆଲ୍ ମିଡ଼ିଆରେ ଭାଇରାଲ୍ ହୋଇଥିବା ଏହି ଫଟୋ ସାଧାରଣରେ ଉତ୍ସୁକତା ସୃଷ୍ଟି କରିଛି ।
ଆଜି କଟକ ବାରବାଟୀ ଷ୍ଟାଡିୟମ୍ ରେ ଅନୁଷ୍ଠିତ ବିଶ୍ୱକପ୍ ହକି ର ଦ୍ୱିତୀୟ ଉଦଘାଟନୀ ଉତ୍ସବକୁ ଅତିଥି ଭାବେ ଆସିଥିଲେ ବଲିଉଡ୍ ଦବଙ୍ଗ ସଲମାନ୍ ଖାନ୍ । ଗତକାଲି କଳିଙ୍ଗ ଷ୍ଟାଡିୟମ୍ ରେ କିଙ୍ଗ୍ ଖାନ୍ ଙ୍କ ଭଳି ବାରବାଟୀ ଷ୍ଟାଡିୟମ୍ ରେ ଭାଇଜାନ୍ ଙ୍କୁ ଦେଖିବାକୁ ଦର୍ଶକଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଥିଲା । ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ସଲମାନ୍ ଙ୍କ ମଜାଖୁସି ଓ ଅନ୍ତରଙ୍ଗ ଆଳାପ ବେଶ୍ ଚର୍ଚ୍ଚାର ବିଷୟ ହୋଇଥିଲା ।
ସଲମାନ୍ ପ୍ରଥମେ ଓଡ଼ିଆରେ ଲୋକଙ୍କୁ ସମ୍ବୋଧିତ କରିଥିଲେ । ମୁଁ ତୁମକୁ ଭଲପାଏ କହି ଦର୍ଶକଙ୍କ ମନ କିଣିନେଇଥିଲେ । ବିଶ୍ୱକପ୍ ହକି ଆୟୋଜନ କରିଥିବାରୁ ସେ ଓଡ଼ିଶା ସରକାରଙ୍କୁ ଧନ୍ୟବାଦ ଜଣାଇବା ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ପ୍ରଶଂସା କରିଥିଲେ । ନବୀନଙ୍କ ବ୍ୟକ୍ତିତ୍ୱ ଉପରେ ଟିପ୍ପଣୀ ଦେବାକୁ ଯାଇ ସେ ତାଙ୍କ କୋହ୍ଲାପୁରୀ ଚପଲର ଅବତାରଣା କରି ପ୍ରଶଂସା କରିଥିଲେ । ଓଡ଼ିଶା ଲୋକଙ୍କ ଏଭଳି ସ୍ୱାଗତରେ ସେ ଅଭିଭୂତ ବୋଲି କହିଥିଲେ । ସଲମାନ୍ ତାଙ୍କ ଅଭିଭାଷଣରେ କଟକର ଭାଇଚାରା ପରମ୍ପରା ଓ କଟକର ପ୍ରସିଦ୍ଧ ଦହିବରା ଆଳୁଦମ କୁ ମନେ ପକାଇ ସେ ଏହାର ମଜା ନେଇଥିବା କହିଥିଲେ ।
ଓଡ଼ିଶା ଓ ଓଡ଼ିଶାବାସୀଙ୍କ ପ୍ରତି ସଲମାନ୍ ଙ୍କ ଶୁଭେଚ୍ଛା ଓ ବିଶ୍ୱକପ୍ ହକିରେ ନିଜକୁ ସାମିଲ କରିଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ଅଭିନନ୍ଦନ ଜଣାଇଥିଲେ । ସଲମାନ୍ ଙ୍କ ସହ କାର୍ଯ୍ୟକ୍ରମରେ ଉପସ୍ଥିତ ପ୍ରସିଦ୍ଧ ସଙ୍ଗୀତ ନିର୍ଦ୍ଦେଶକ ଓ ଗାୟକ ଏ.ଆର. ରହେମାନ୍ ଙ୍କୁ ମୁଖ୍ୟମନ୍ତ୍ରୀ ସମ୍ବର୍ଦ୍ଧିତ କରିଥିଲେ । ଷ୍ଟେଜ୍ ରେ ସଲମାନ୍ ଓ ରହେମାନ୍ ଦର୍ଶକଙ୍କ ଭରପୁର ମନୋରଂଜନ କରିଥିଲେ ।
ଆଜି ସଲମାନ୍ ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ ତାଙ୍କୁ ଦେଖିବା ପାଇଁ ପ୍ରବଳ ଭିଡ଼ ହୋଇଥିଲା । ବିମାନବନ୍ଦରରେ ତାଙ୍କୁ ପାଛୋଟି ନେଇଥିଲେ ମୁମ୍ବାଇର ପୂର୍ବତନ ପୁଲିସ କମିଶନର ତଥା ବିଜୁ ଯୁବବାହିନୀ ମୁଖ୍ୟ ଅରୂପ ପଟ୍ଟନାୟକ । ସେଠାରୁ କଟକ ଯାତ୍ରା କରିଥିଲେ ସଲମାନ । ଭୁବନେଶ୍ୱରରୁ କଟକ ପର୍ଯ୍ୟନ୍ତ ରାସ୍ତାରେ ସଲମାନ୍ ଙ୍କୁ ଦେଖିବା ପାଇଁ ଲୋକଙ୍କର ପ୍ରବଳ ଭିଡ଼ ହୋଇଥିଲା ।
ଆରମ୍ଭରୁ ଜମେଇଦେଲେ ଟିମ୍ ଇଣ୍ଡିଆ
