କୋଲକତା: ସିବିଆଇ ଟିମ୍ କୁ ଗୋଡ଼େଇ ଛତ୍ରଭଙ୍ଗ କଲା କୋଲକତା ପୁଲିସ । ପୁଲିସ କମିଶନରଙ୍କ ଘର ଆଗରେ ସିବିଆଇ ଟିମ୍ ର ବାଟ ଓଗାଳିଲା । ଧକ୍କା ମାରି ମାରି ଥାନାକୁ ନେଇଗଲା । ୫ ଜଣ ସିବିଆଇ ଅଧିକାରୀଙ୍କୁ ଥାନାରେ ଠୁଙ୍କିଦେଲା । ପୁଲିସ ଡିଜିଙ୍କୁ ସାଙ୍ଗରେ ଧରି ମୁଖ୍ୟମନ୍ତ୍ରୀ ମମତା ବାନାର୍ଜୀ ଘଟଣାସ୍ଥଳକୁ ଗଲେ । ମୋଦିଙ୍କ ସିବିଆଇ ବିରୋଧରେ ଧାରଣାରେ ବସିଲେ । ମରିଯିବି ପଛେ ଛାଡ଼ିବି ନାହିଁ ବୋଲି ଧମକ ଦେଲେ । ମମତାଙ୍କ ପଞ୍ଜୁରୀରେ ଶୁଆ ବନିଗଲା ସିବିଆଇ ।
ଆଜି ସଂଧ୍ୟାରେ କୋଲକତା ପାର୍କ ଷ୍ଟ୍ରିଟ୍ ସ୍ଥିତ ପୁଲିସ କମିଶନର ରାଜୀବ କୁମାରଙ୍କ ଘର ସାମନାରେ ଏହି ଦୃଶ୍ୟ ସାରା ଦେଶରେ ନିଆଁ ଲଗାଇ ଦେଇଛି । ମମତା ବାନାର୍ଜୀଙ୍କ ତାକତ୍ ଆଗରେ ସିବିଆଇ ଚେହେରା ଫିକା ପଡ଼ିଯାଇଛି । ମୋଦି ସରକାରଙ୍କୁ ଅଡୁଆରେ ପକାଇ ଦେଇଛି । ସିବିଆଇକୁ ମୋଦି ସରକାର ରାଜନୈତିକ ଅସ୍ତ୍ର କରିବାର ଅଭିଯୋଗ ନିର୍ଣ୍ଣାୟକ ମୋଡ଼ ନେଇଛି । ଦେଶ ସାମ୍ବିଧାନିକ ସଙ୍କଟ ଆଡକୁ ଗତି କରିଛି । ସଂଘୀୟ ଭାରତବର୍ଷ ଅସ୍ଥିରତାର ସାମନା କରିଛି ।
କୋଲକତା ପୁଲିସ କମିଶନର ରାଜୀବ କୁମାରଙ୍କ ଘରେ ସିବିଆଇ ରେଡ୍ ଉଦ୍ୟମ ଘଟଣା ଏହି ବିସ୍ଫୋରକ ପରିସ୍ଥିତି ସୃଷ୍ଟି କରିଛି । ଆଜି ସଂଧ୍ୟାରେ ସିବିଆଇର ଏକ ଟିମ୍ ରାଜୀବ କୁମାରଙ୍କ ଘର ଆଗରେ ଚକ୍କର କାଟିଥିଲେ । ଠିକ୍ ୬ଟା ବେଳେ ସେମାନେ ରାଜୀବଙ୍କ ଘର ଆଗରେ ପହଞ୍ଚି ଭିତରକୁ ପଶିବାକୁ ଉଦ୍ୟମ କରିଥିଲେ । ମାତ୍ର ସେଠାରେ ପୂର୍ବରୁ ସଜାଗ ଥିବା କୋଲକତା ପୁଲିସ ସେମାନଙ୍କ ବାଟ ଓଗାଳିଥିଲା । ସିବିଆଇ ଅଧିକାରୀମାନେ ଜୋର୍ ଜବରଦସ୍ତ ପଶିବାକୁ ଉଦ୍ୟମ କରିବାକୁ ପୁଲିସ ସେମାନଙ୍କୁ ଧକ୍କା ମାରି ଘଉଡ଼ାଇବାକୁ ଲାଗିଲା । ୫ ଜଣ ସିବିଆଇ ଅଧିକାରୀ ମୁହାଁମୁହିଁ ହେବାରୁ ପୁଲିସ ସେମାନଙ୍କୁ ପ୍ରଥମେ ପାର୍କ ଷ୍ଟ୍ରିଟ୍ ଥାନା ଏବଂ ସେଠାରୁ ସେକ୍ସପିୟର ସରଣୀ ଥାନା ନେଇଯାଇଥିଲା । ସେମାନଙ୍କୁ ଥାନାରେ ଠୁଙ୍କି ଅଟକ ରଖିଦେଲା । କୋଲକତାସ୍ଥିତ ସିବିଆଇ ଅଫିସକୁ ବି ଘେରାବନ୍ଦୀ କରି ରଖିଲା କୋଲକତା ପୁଲିସ । ଅବଶ୍ୟ ପରେ ଅଟକ ସିବିଆଇ ଅଧିକାରୀଙ୍କୁ ପୁଲିସ ଛାଡ଼ିଦେଲା ।
