ଭୁୁବନେଶ୍ୱର: ନିର୍ବାଚନ ପ୍ରଚାର ବେଳେ ଚାଷୀ ଓ ମହିଳାମାନଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦେଇଥିବା ଦୁଇଟି ବଡ଼ ପ୍ରତିଶ୍ରୁତିକୁ ଆଜି ପାଳନ କରିଛନ୍ତି । ଆଜି ପଞ୍ଚମ ପାଳିର ଦାୟିତ୍ୱ ନେବା ପରେ ପ୍ରଥମ କ୍ୟାବିନେଟ୍ ବୈଠକରେ ଏହି ପ୍ରତିଶ୍ରୁତିକୁ କାର୍ଯ୍ୟକାରୀ କରାଯାଇଛି । ଆଜିଠାରୁ କାଳିଆ ଯୋଜନା ଟଙ୍କା ପ୍ରଦାନ ଆରମ୍ଭ ହେବା ସହ ମହିଳା ଏସଏଚଜି ବା ମିଶନ ଶକ୍ତି ପାଇଁ ହଜାରେ କୋଟିର କାମ ଅନୁମୋଦନ କରାଯାଇଛି ।
ଏବେ ସମୁଦାୟ ୭୫ ଲକ୍ଷ ପରିବାରକୁ କାଳିଆ ଯୋଜନା ଟଙ୍କା ମିଳିବ । ପୂର୍ବରୁ ୪୨ ଲକ୍ଷ ପରିବାରଙ୍କ ତାଲିକା ପ୍ରସ୍ତୁତ ହୋଇଥିବା ବେଳେ ସେଥିରେ ଆଉ ୩୩ ଲକ୍ଷ ପରିବାରକୁ କାଳିଆ ଯୋଜନାରେ ସାମିଲ କରାଯାଇଛି । ଆଜିଠାରୁ ସପ୍ତାହକ ମଧ୍ୟରେ ୨୫ ଲକ୍ଷ ହିତାଧିକାରୀଙ୍କୁ କାଳିଆ ଟଙ୍କା ମିଳିବ । କ୍ୟାବିନେଟ୍ ବୈଠକ ଶେଷରେ ମୁଖ୍ୟମନ୍ତ୍ରୀ ଏହି ଘୋଷଣା କରିଛନ୍ତି ।
ସେହିଭଳି ମହିଳା ଏସଏଚଜିକୁ ୧ ହଜାର କୋଟି ଟଙ୍କାର କାମ ଅନୁମୋଦନ କରାଯାଇଛି । ୪୦ଟି ବିଭିନ୍ନ ପ୍ରକାରର କାର୍ଯ୍ୟରେ ଏସଏଚଜିମାନେ ନିୟୋଜିତ ହେବେ । ସେମାନେ ଧାନ ସଂଗ୍ରହ କରିବାଠାରୁ ଆରମ୍ଭ କରି ପିଲାଙ୍କ ୟୁନିଫର୍ମ, ମଧ୍ୟାହ୍ନ ଭୋଜନ, ହସ୍ପିଟାଲ୍ ରେ ଖାଦ୍ୟ ଯୋଗାଇବା କାର୍ଯ୍ୟ କରିବେ ।
ସରକାରକୁ ଆସିବା ଦିନ ହିଁ କାଳିଆ ଓ ମିଶନ୍ ଶକ୍ତି ର ପ୍ରତିଶ୍ରୁତିକୁ ପାଳନ କରିବାକୁ ପ୍ରତିଶ୍ରୁତି ଦେଇଥିଲି । ସେହି ପ୍ରତିଶ୍ରୁତିକୁ ଆଜି ପାଳନ କରୁଛି ବୋଲି ମୁଖ୍ୟମନ୍ତ୍ରୀ କହିଥିଲେ ।
