ଭୁୁବନେଶ୍ୱର: ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ଗାଡ଼ି ଉପରେ ହମଲା କରିଥିବା ଦୁର୍ବୃତ୍ତ ଚିହ୍ନଟ ହୋଇଛନ୍ତି । ଗ୍ୟାଙ୍ଗ୍ ଲିଡର ହେଉଛନ୍ତି କେନ୍ଦୁଝର ଜିଲ୍ଲା ଯୁବମୋର୍ଚ୍ଚା ସମ୍ପାଦକ ସଞ୍ଜୟ ମହାନ୍ତି । ମାତାଲ ସଞ୍ଜୟ ଏବଂ ତାଙ୍କର ବନ୍ଧୁମାନେ ପିସିସି ସଭାପତିଙ୍କ ଗାଡ଼ିକୁ ଅଟକାଇ ତାଙ୍କ ଡ୍ରାଇଭର ଓ ସୁରକ୍ଷାକର୍ମୀଙ୍କୁ ପିଟିଥିଲେ । ଆଜି ସଞ୍ଜୟଙ୍କୁ ପୁଲିସ ଗିରଫ କରି ଜେଲ୍ ପଠାଇଛି । ଅନ୍ୟମାନଙ୍କୁ ଖୁବ୍ ଶୀଘ୍ର ଧରାଯିବ ବୋଲି ପୁଲିସ କହିଛି ।
ସଞ୍ଜୟଙ୍କ ଗିରଫ ପରେ ବିଜେପି ନେତାଙ୍କ ଅକଲ ଗୁଡୁମ୍ ହୋଇଛି । ବିଜେଡ଼ି ବିରୋଧରେ ରାଜନୈତିକ ହିଂସାକୁ ଅସ୍ତ୍ର କରି ରାଜ୍ୟରେ ହଟଚମଟ କରୁଥିବା ବିଜେପି ନିଜେ ସେହି ରାସ୍ତାରେ ବୋଲି ପ୍ରମାଣିତ କରିଛି । ପିସିସି ସଭାପତି ନିରଞ୍ଜନ ପଟ୍ଟନାୟକ, ବିଧାୟକ ଦଳ ନେତା ନରସିଂହ ମିଶ୍ରଙ୍କ ସମେତ ଦଳର ବରିଷ୍ଠ ନେତୃବର୍ଗ ବିଜେପି ଉପରେ ବର୍ଷିଛନ୍ତି । ଦଳ ପକ୍ଷରୁ ବିଭିନ୍ନ ସ୍ଥାନରେ ପ୍ରତିବାଦ ଆନେ୍ଦାଳନ ଆରମ୍ଭ ହୋଇଛି ।
ଅନ୍ୟପକ୍ଷରେ ବିଜେଡ଼ି ଏହି ଘଟଣାକୁ ନିନ୍ଦା କରିବା ସହ ବିଜେପିର ଏଭଳି ହୀନ କାର୍ଯ୍ୟକୁ ତୀବ୍ର ସମାଲୋଚନା କରିଛନ୍ତି । ଓଡ଼ିଶାରେ ବିଜେପି ତ୍ରିପୁରା ମଡେଲ୍ ଆପଣେଇଥିବା ଦଳର ମୁଖପାତ୍ର ଲେଲିନ୍ ମହାନ୍ତି କହିଛନ୍ତି । ବିଜେଡ଼ି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ କହିଛନ୍ତି, ଏହା ବିଜେପି ନେତାଙ୍କ ଅସଲ ରଙ୍ଗ ପଦାକୁ ଆଣିଛି । ଗଣତନ୍ତ୍ର ଓ ସଭ୍ୟ ସମାଜରେ ହିଂସାର ସ୍ଥାନ ନାହିଁ ବୋଲି ପ୍ରଣବ ତାଙ୍କ ପ୍ରତିକ୍ରିୟାରେ କହିଛନ୍ତି ।
ଲଜ୍ଜାର କଥା, ବିଜେପି ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ ଦଳ ଉପରୁ ଦୋଷ ଝାଡ଼ିବାକୁ ସଂପୃକ୍ତ ଆକ୍ରମଣକାରୀ ସଞ୍ଜୟ ମହାନ୍ତିଙ୍କୁ ପର କରିଦେଇଛନ୍ତି । ସେ ବିଜେପି ଯୁବମୋର୍ଚ୍ଚାରେ ନାହାନ୍ତି ବୋଲି ଗଣମାଧ୍ୟମରେ ସଫେଇ ଦେଇଛନ୍ତି । ତେବେ ବିଜେପି ରାଜ୍ୟ ସଭାପତି ସମୀର ମହାନ୍ତି ଏଭଳି ଘଟଣାକୁ ନିନ୍ଦା କରି ଟ୍ୱିଟ୍ କରିଛନ୍ତି ।
ସୂଚନାଥାଉକି, ପିସିସି ସଭାପତି ନିରଞ୍ଜନ ପଟ୍ଟନାୟକ ଗତକାଲି ଭୁବନେଶ୍ୱରରୁ କେନ୍ଦୁଝର ଯାଉଥିଲେ । ସଂଧ୍ୟା ପ୍ରାୟ ୮ଟା ବେଳେ କେନ୍ଦୁଝର ସହରର କାଶୀପୁର ଅତିକ୍ରମ କରୁଥିଲା ବେଳେ ପଛପଟୁ ଦୁବୃର୍ତ୍ତ ଏକ ବୋଲେରୋ ଦ୍ରୁତ ଗତିରେ ଆସି ସେମାନଙ୍କ ଗାଡ଼ିକୁ ଅଟକାଇଥିଲେ । ସମସ୍ତେ ମଦ ପିଇ ମାତାଲ୍ ଅବସ୍ଥାରେ ଥିଲେ । କାହିଁକି ଗାଡିକୁ ଓଭରଟେକ୍ କଲ ବୋଲି ଅଭଦ୍ର ଭାଷାରେ ଗାଳି କରିବା ସହ ଡ୍ରାଇଭରର ସାର୍ଟ କଲର୍ ଧରି ମୁଥ ମାରିଥିଲେ । ଶ୍ରୀ ପଟ୍ଟନାୟକଙ୍କ ପିଏସଓ ରାଜେଶ ସିଂହଙ୍କୁ ମଧ୍ୟ ଗାଡ଼ି ଭିତରୁ ଟାଣି ଆଣି ପ୍ରବଳ ପିଟିଥିଲେ ।
ଗାଡ଼ିରେ ବସିଥିବା ନିରଞ୍ଜନ ପଟ୍ଟନାୟକ ପ୍ରଥମେ କିଛି ବୁଝି ପାରି ନ ଥିଲେ । ମଦ ପିଇ ମାତାଲ୍ ହୋଇଥିବାରୁ ଯୁବକମାନେ ଏମିତି ଉତ୍ପାତ କରୁଛନ୍ତି ବୋଲି ଭାବି ନେଇଥିଲେ । ଦୁବୃର୍ତ୍ତଙ୍କ ପିଛା ମାତ୍ର ଗ୍ୟାଙ୍ଗ ଲିଡର୍ ସଞ୍ଜୟ ମହାନ୍ତି ବିଜେପି ଯୁବମୋର୍ଚ୍ଚା ନେତା ବୋଲି ଜଣାପଡିବା ପରେ ଏହି ଆକ୍ରମଣ ପଛରେ ରାଜନୈତିକ ପ୍ରତିହିଂସା ଥିବା ସେ କହିଛନ୍ତି । ଗତକାଲିର ଏହି ଘଟଣା ପରେ କେନ୍ଦୁଝର କଂଗ୍ରେସ ଶିବିରରେ ପ୍ରବଳ ଉତ୍ତେଜନା ସୃଷ୍ଟି ହୋଇଛି ।
