ଭୁୁବନେଶ୍ୱର: ଆଜିଠାରୁ ଦେଶବ୍ୟାପୀ ଆରମ୍ଭ ହୋଇଛି କରୋନା ଟିକାକରଣ ଅଭିଯାନ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡ଼ିଓ କନଫରେନ୍ସିଂ ଜରିଆରେ ଏହାର ଶୁଭାରମ୍ଭ କରିଥିଲେ । ଓଡ଼ିଶାରେ ଆଜି ପ୍ରଥମ ଦିନରେ ୮୪% ଟିକାଦାନ ହୋଇଛି । ୧୬,୩୩୦ ଜଣ ସ୍ୱାସ୍ଥ୍ୟକର୍ମୀ ଓ କୋଭିଡ୍ ଯୋଦ୍ଧାଙ୍କୁ ଟିକା ଦେବାକୁ ଲକ୍ଷ୍ୟ ରହିଥିଲା ବେଳେ ସଂଧ୍ୟା ୭ଟା ସୁଦ୍ଧା ୧୩,୭୪୫ ଜଣ ଟିକା ନେଇଥିବା ଜଣାପଡିଛି ।
ଭଦ୍ରକରେ ସର୍ବାଧିକ ୧୦୯% ଟିକାଦାନ ହୋଇଥିଲା ବେଳେ କୋରାପୁଟରେ ୧୦୫% ଏବଂ ଅନୁଗୁଳ, ବାଲେଶ୍ୱର ଓ କନ୍ଧମାଳରେ ୧୦୦% ଟିକାଦାନ ହୋଇଛି । କଟକରେ ୭୬% ଏବଂ ଭୁବନେଶ୍ୱରରେ ୮୧% ଟିକାଦାନ ହୋଇଛି ।
ଆଜି ଭୁବନେଶ୍ୱରରେ ସଫେଇ କର୍ମଚାରୀ ବିରଞ୍ଚି ନାୟକ ଓ କଟକରେ ସଫେଇ କର୍ମଚାରୀ ବର୍ଷା ଦେଇ ପ୍ରଥମେ କରୋନା ଟିକା ନେଇଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭର୍ଚୁଆଲ ମାଧ୍ୟମରେ କ୍ୟାପିଟାଲ୍ ହସ୍ପିଟାଲ୍ ର ପ୍ରଥମ ଟିକା ନେଇଥିବା ସଫେଇ କର୍ମଚାରୀ ବିରଞ୍ଚି ନାୟକ, ସୁନ୍ଦରଗଡ଼ର ଜଣେ ଷ୍ଟାଫ୍ ନର୍ସ ଓ ଗଞ୍ଜାମର ଜଣେ ଡାକ୍ତରଙ୍କ ସହ କଥା ହୋଇସେମାନଙ୍କ ଅନୁଭୂତି ଶୁଣିଥିଲେ ।
ଏହି ଟିକାକୁ ନେଇ ଲୋକଙ୍କ ମନରେ ରହିଥିବା ଭ୍ରାନ୍ତ ଧାରଣା ଦୂରେଇବା ପାଇଁ କିଛି ବିଶିଷ୍ଟ ଡାକ୍ତର ଓ ସରକାରୀ ପଦାଧିକାରୀ ଆଗ ଟିକା ନେଇଥିଲେ । ଡିଏମଇଟି ନିର୍ଦ୍ଦେଶକ ଡାକ୍ତର ସିବିକେ ମହାନ୍ତି, ଏମସ୍ ନିର୍ଦ୍ଦେଶିକା ଡାକ୍ତର ଗୀତାଞ୍ଜଳି ବତ୍ମାନାବନେ, କିମସ୍ ନିର୍ଦ୍ଦେଶକ ଡାକ୍ତର ପ୍ରଦୀପ କୁମାର ପଟ୍ଟନାୟକ, ସୋଆ ବିଶ୍ୱବିଦ୍ୟାଳୟ କୁଳପତି ପ୍ରଫେସର ଡାକ୍ତର ଅଶୋକ ମହାପାତ୍ର, ଏସସିବି ମେଡିକାଲ କଲେଜର ଭେଷଜ ବିଭାଗ ମୁଖ୍ୟ ଡାକ୍ତର ଜୟନ୍ତ କୁମାର ପଣ୍ଡା, ଯକ୍ଷ୍ମା ଓ ଛାତିରୋଗ ବିଭାଗର ମୁଖ୍ୟ ପ୍ରଫେସର ଡାକ୍ତର ମନୋରଂଜନ ପଟ୍ଟନାୟକ, କ୍ୟାପିଟାଲ୍ ହସ୍ପିଟାଲ୍ ନିର୍ଦ୍ଦେଶକ ଡାକ୍ତର ଲକ୍ଷ୍ମୀଧର ସାହୁ ଓ ଆହୁରି ଅନେକ ବ୍ୟକ୍ତି । ସାରା ରାଜ୍ୟରୁ ଟିକାକରଣର କୌଣସି ପାଶ୍ୱର୍ ପ୍ରତିକ୍ରିୟା ରିପୋର୍ଟ ଆସିନାହିଁ ।
ରାଜ୍ୟର ମୋଟ ୧୬୧ ଟି ଟିକାଦାନ କେନ୍ଦ୍ରରେ ଟିକାଦାନ କରାଯାଇଛି । ପ୍ରତି କେନ୍ଦ୍ରରେ ଦୈନିକ ୧୦୦ ଜଣଙ୍କୁ ଟିକା ଦିଆଯିବ । ଆସନ୍ତାକାଲି ରବିବାର ଟିକାକରଣ ବନ୍ଦ ରହିବ ଏବଂ ସୋମବାରଠାରୁ ପୁଣି ପ୍ରକ୍ରିୟା ଚାଲିବ । ପ୍ରଥମ ଦଫାରେ ରାଜ୍ୟରେ ୧ ଲକ୍ଷ ୯୨ ହଜାର ସ୍ୱାସ୍ଥ୍ୟକର୍ମୀଙ୍କୁ କରୋନା ଟିକା ଦିଆଯିବ । ଆସନ୍ତା ୨୫ ସୁଦ୍ଧା ୩ ଲକ୍ଷ ୨୮ ହଜାର ସ୍ୱାସ୍ଥ୍ୟକର୍ମୀଙ୍କୁ ଟିକା ଦେବାକୁ ଲକ୍ଷ୍ୟ ରଖାଯାଇଛି ।