ଭୁବନେଶ୍ୱର: ଭାରତୀୟ ସେନାର ୪୨ତମ ଭାଇସ୍ ଚିଫ୍ ହେବେ ଓଡ଼ିଆ ଅଫିସର ଚଣ୍ଡୀପ୍ରସାଦ ମହାନ୍ତି । ଭାଇସ୍ ଚିଫ୍ ପଦକୁ ଉନ୍ନୀତ ହେବାରେ ସେ ପ୍ରଥମ ଓଡ଼ିଆ ଅଫିସର । ଆସନ୍ତା ୩୧ ତାରିଖରେ ସେ ଲେଫ୍ଟନାଣ୍ଟ ଜେନେରାଲ ଏସ.କେ.ସାଇନିଙ୍କଠାରୁ ଦାୟିତ୍ୱ ଗ୍ରହଣ କରିବେ ।
ଲେଫ୍ଟନାଣ୍ଟ ଜେନେରାଲ ଚଣ୍ଡୀପ୍ରସାଦ ମହାନ୍ତି ହେଉଛନ୍ତି ୧୯୮୨ ବ୍ୟାଚ ରାଜପୁତ ରେଜିମେଣ୍ଟର ପଦାତିକବାହିନୀ ଅଧିକାରୀ । ଭାରତୀୟ ସେନାରେ ଦୀର୍ଘ ୩୮ ବର୍ଷର କାର୍ଯ୍ୟକାଳ ଭିତରେ ସେ ନିଜ ଦକ୍ଷତାର ପ୍ରମାଣ ଦେଇଛନ୍ତି । ଆସାମରେ ଚାଲିଥିବା ‘ଅପରେସନ ଅଲ କ୍ଲିୟର’ ର ମୁଖ୍ୟ ଥିଲେ ଶ୍ରୀ ମହାନ୍ତି । ଆସାମକୁ ଉଲଫା କବଳରୁ ମୁକ୍ତ କରି ଶାନ୍ତି ପ୍ରତିଷ୍ଠା କରିବାରେ ତାଙ୍କର ମୁଖ୍ୟ ଭୂମିକା ଥିଲା ।
ପ୍ରତିରକ୍ଷା କ୍ଷେତ୍ରରେ ଲେଫ୍ଟନାଣ୍ଟ ଜେନେରାଲ ଶ୍ରୀ ମହାନ୍ତିଙ୍କ ଗବେଷଣା ବି ଉଚ୍ଚକୋଟିର । ଚୀନ୍, ଦକ୍ଷିଣ ଏସିଆ ଓ ଉତ୍ତର-ପୂର୍ବ ଦେଶ ଉପରେ ସେ ଗବେଷଣା କରିଛନ୍ତି ।
ଜଗତସିଂହପୁରର ଜେ.କେ. ମହାନ୍ତି ଓ ଡ. ଶାରଦା କୁମାରୀଙ୍କ ଜ୍ୟେଷ୍ଠପୁତ୍ର ହେଉଛନ୍ତି ଚଣ୍ଡୀପ୍ରସାଦ । ଦୁଇଟି ଡିଫେନ୍ସ ମାଷ୍ଟର ଡିଗ୍ରୀ ସହ ଏମଫିଲ୍ କରିଛନ୍ତି ।