ଭୁବନେଶ୍ୱର: ବିଶିଷ୍ଟ ଶ୍ରମିକ ନେତା ତଥା ସମାଜସେବୀ ଲଳିତ ନାୟକ ଆଉ ନାହାନ୍ତି । ଏମ୍ସରେ ଚିକିତ୍ସାଧୀନ ଅବସ୍ଥାରେ ଆଜି ସକାଳ ସାଢ଼େ ୫ଟାରେ ଆଖି ବୁଜିଦେଇଛନ୍ତି । ସମାଜସେବା କ୍ଷେତ୍ରରେ ଜଣେ ଅନନ୍ୟ ବ୍ୟକ୍ତିତ୍ୱ ଲଳିତ ନାୟକଙ୍କ ବିୟୋଗ ପଶ୍ଚିମ ଓଡ଼ିଶାବାସୀଙ୍କୁ ସ୍ତବ୍ଧ କରିଦେଇଛି । ସମାଜସେବୀ ପଦ୍ମଶ୍ରୀ ଡ. ପ୍ରକାଶ ରାଓଙ୍କ ଅକଳା ନିଧନର ଦିନ କେଇଟାରେ ଓଡ଼ିଶା ଆଉ ଜଣେ ସମାଜସେବୀଙ୍କୁ ଅକାଳରେ ହରାଇବା ରାଜ୍ୟ ପାଇଁ ଅପୂରଣୀୟ କ୍ଷତି ଆଣିଛି ।
ଦୁଃଖୀ ଦରିଦ୍ରଙ୍କ ବନ୍ଧୁ ଭାବେ ପଶ୍ଚିମ ଓଡ଼ିଶାର ଘରେ ଘରେ ପରିଚିତ ଥିଲେ ବଲାଙ୍ଗୀରର ଏହି ମହାନ୍ ପୁରୁଷ । ଛାତ୍ର ଜୀବନରୁ ଦୃଢ଼ ସାଂଗଠନିକ ନେତୃତ୍ୱ ଓ ପରୋପକାରୀ ଗୁଣ ପାଇଁ ସମସ୍ତେ ତାଙ୍କୁ ଆଦର ଓ ସମ୍ମାନ ଦେଉଥିଲେ । ଅଶୀ ଦଶକରେ ରାଜେନ୍ଦ୍ର କଲେଜର ଛାତ୍ର ସଂସଦ ସଭାପତି ଭାବେ ସେ ବେଶ୍ ଚର୍ଚ୍ଚିତ ଥିଲେ । ସେବେଠାରୁ ବିଭିନ୍ନ ସଂଗଠନ ସହ ସକ୍ରିୟ ଭାବେ ଜଡ଼ିତ ରହିଥିଲେ । ଅନୁ୍ୟନ ୫୦ଟି ସଂଗଠନ ସହ ସେ ସଂପୃକ୍ତ ଥିଲେ । ରକ୍ତଦାନ କ୍ଷେତ୍ରରେ ତାଙ୍କର ଭୂମିକା ଅବିସ୍ମରଣୀୟ । ନିଜେ ରକ୍ତ ଦେବା ସହ ଅନ୍ୟମାନଙ୍କୁ ରକ୍ତଦାନ କରିବାକୁ ପ୍ରବର୍ତ୍ତଉଥିଲେ । ନିଜେ ୮୦ ଥର ରକ୍ତଦାନ କରି ସେ ରାଜ୍ୟପାଳ ଏବଂ ବିଭିନ୍ନ ସଂଗଠନ ପକ୍ଷରୁ ବହୁବାର ପୁରସ୍କୃତ ହୋଇଥିଲେ ।
ସମାଜସେବାରେ ନିଜକୁ ବ୍ରତୀ କରିଥିବା ସ୍ୱର୍ଗତ ନାୟକ ଆଜୀବନ ଅବିବାହିତ ଥିଲେ । ସମାଜସେବା କାର୍ଯ୍ୟରେ ସଦାବେଳେ ବ୍ୟସ୍ତ ରହୁଥିବା ଲଳିତ ଗତବର୍ଷ ଜୁନ୍ ମାସରେ ଏକ ଦୁର୍ଘଟଣାର ଶିକାର ହୋଇଥିଲେ । ତାଙ୍କ ବାମଗୋଡ଼ର ଜଘଂରେ ଗଭୀର ଆଘାତ ଲାଗିଥିଲା । ପରବର୍ତ୍ତୀ ସମୟରେ ସେ କ୍ୟାନସରରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ । ତେବେ ତାଙ୍କ ସ୍ୱାସ୍ଥ୍ୟରେ ସୁଧାର ଆସିଲା ବେଳକୁ ସେ ଦୁଇମାସ ତଳେ କରୋନାରେ ଆକ୍ରାନ୍ତ ହୋଇଥିଲେ । ଫଳରେ ତାଙ୍କର ସ୍ୱାସ୍ଥ୍ୟ ଆହୁରି ବିଗିଡ଼ି ଯାଇଥିଲା ।
ଆଜି ଶ୍ରୀ ନାୟକଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ପଶ୍ଚିମ ଓଡ଼ିଶାରେ ଶୋକର ଛାୟା ଖେଳିଯାଇଛି । ତାଙ୍କ ବିୟୋଗରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଭୀର ଲୋକ ପ୍ରକାଶ କରିଛନ୍ତି ।
